Në mes të sezonit, Renato Mekolli largohet nga “Hell’s Kitchen”. Lajmin e ka bërë të ditur vetë autorja e formatit, Zefina Hasani. Nëpërmjet rrjeteve sociale ajo ka bërë me dije se për arsye personale, Mekolli nuk do të jetë më shefi i kuzhinës më të famshme në Shqipëri. Ajo ka gjetur rastin të falenderojë Alsi Sinanaj, që ka pranuar të vijë nga Athina “në një kohë rekord”, siç e ka cilësuar vetë autorja.
Nga ana tjetër, Renato ka reaguar në Instastory, duke publikuar këtë shkrim: “Disa mbase do gëzohen, disa do mërziten! Vazhdimit nuk i dihet…Fund…” pa dhënë asnjë arsye pse e braktisi emisionin në mes të sezonit. Më pas, shefi i kuzhinës ka publikuar edhe këngën e famshme të Flor Mumajesit, “Plas”, ndërsa krahas saj shkruan: “S’kena me u pa mo bashkë”.